Civil wedding file annulment case-Magkano po, saan mag-file at paano?

Kayo po ay maaaring mag-file ng annulment case kung saan kayo nakatira, kung saan kayo kinasal, o kung saan kayo'y naninirahan noong kayo'y nagsasama pa, o kung saan matatagpuan ang inyong asawa. Kung may mga anak kayo at ayaw ibigay sa inyo ang inyong mga anak, mas maiging kung saan nakatira ang inyong mga anak, doon kayo mag-file ng annulment at tuloy habeas corpus na para ang mga anak ninyo ay iyong makita. Itanong po ninyo sa inyong abogado kung saan pinaka-maiging i-file ang inyong kaso.

Kung sa magkano, wala pong suggested retail price ang annulment, sapagkat ito po ay hindi paninda sa grocery o palengke. Ang presyo pong sisingilin sa inyo ng inyong abogado ay dedepende una sa hirap ng inyong kaso, sa hirap noong abogado sa paglalakbay patungo a lugar ng paglilitis, sa kalibre ng abogado, sa kanyang experience, sa dami ng mga kasong kanyang hinahawakan, at sa inyo din. Kasi, may mga kliyente na payag na sila ang lumakad ng mga ipa-file, mga kukuhaning dokumento, mga ipapa-xerox at ipapa-mail. Kaya acceptance at appearance fee lang ang sisingilin ng abogado.

Kung kaibigan o kamag-anak naman ninyo, o kapananampalataya ninyo, baka puede ang pang meryenda na lamang, puede din namang contingent (kung may hinihingi kayong danyos sa inyong asawa).

Sa husgado, may babayarang docket fees (nagbabagopbago po ang docket fees depende sa lugar, at sa klase ng kaso, sa laki ng hinihinging danyos or supporta. May babayaran din para sa pagpapa-certified true copy ng mga dokumento tulad ng marriage certificate, birth certificate ng mga anak, etc. kailangan ding bigyan ng pamasahe ang bailiff ng husgado na maghahatid ng summons. kailangan ding bayaran ang mga transcript.

Maghanda kayo ng malaking pera para sa mga gastusin. Parang paghahanap din po ng doktor iyan kung kayo'y magpapa-opera, mas mura sigurado kung kayo'y magpapa-opera sa PGH or sa Ospital ng Maynila kaysa sa kung kayo'y magpapa-opera sa pribadong ospital. At kailangan din po ninyong mag hanap ng second opinion. Magtanong-tanong. Kung ako po sa inyo, pumunta po kayo sa Family Court na pinaka-malapit sa inyo. Umupo po kayo sa husgado at makinig sa mga pagdinig. Pagmasdan po ninyo iyong mga humaharap, pakinggan silang makipagptalastasan, at makikita po ninyo kung sila'y mabibigyan ninyo ng inyong pagtitiwala.