Sa aking pagkakaalam ang sisig ay isang Kampanpangan na putahe. Napakasikat nito sa Pilipinas at sa kahit anong carenderia ay laging may binebentang ganito. Kahit din sa mga Filipino restaurants, malimit na ito ay kasama sa kanilang menu.
Ang recipe ng sisig na ito any binubuo lamang ng iilang sangkap. Napakadaling lutuin at sundan.
Pork Sisig
8 piraso tenga ng baboy1
200g pork belly/ tyan ng baboy
100g atay ng baboy2
2 cups chicharong baboy
1 cup suka
4 kutsara toyo
4 kutsara mayonnaise
3 piraso siling pula, tadtarin
5-6 piraso kalamansi, pigain at itabi ang juice3
2 piraso maliliit na sibuyas, hiniwa sa maninipis na piraso
6 cloves/piraso bawang, hiniwa ng pino
1 piraso maliit ng luya, hiniwa ng pino
dahon ng laurel
itlog
asin at pamintang durog
1. Sa isang kaserola, pakuluan ang tenga ng baboy at pork belly sa suka, dahon ng laurel, asin at paminta sa loob ng dalawampu’t limang minuto (25 minutes).
2. Gumamit ng pansala at i-drain ang tubig na pinagkuluan.
3. Sa isang kawali, maglagay ng mantika at prituhin ang tenga at pork belly sa loob ng dalawampung minuto o sampung minuto sa bawat magkabilang gilid. Hanguin.
4. Gamit ang parehong kawaling pinagprituhan, isunod na gisahin4 ang atay ng baboy.
5. Kapag naluto na, tadtarin ang mga ito ng pinong pino.
6. Sa isang malaking bowl, ilagay ang mga natadtad na laman. Ibuhos ang soy sauce, pamintang durog and tinadtad na sili.
7. Gamit muli ng kawaling pinagprituhan kanina, igisa ang bawang at luya. Ilagay ang mixture mula sa bowl at igisa hanggang lumutong ang baboy.
8. Ihalo ang mayonnaise at chicharon.
9. Ilipat ito sa plato habang mainit na mainit at lagyan ng hilaw na itlog sa ibabaw at pinigang calamansi.
Tips:
1. Tenga ng baboy – Maaari ring gumamit ng pisngi ng baboy sa parehong timbang ng 8 tenga ng baboy.
2. Atay ng baboy – Maaari ring gumamit ng atay ng manok, para sa akin mas malinamnam ito kesa sa atay ng baboy. Ngunit may mga nagsasabi naman na mas masarap ang atay ng baboy. Nasasainyo kung ano ang mas gusto n’yong gamitin.
3. Kalamansi – Maaari ring gumamit ng lemon, nagbibigay ito ng ibang lasa kung masyado na kayong pamilyar sa lasa ng kalamansi.
4. Gisahin ang atay ng baboy – nasubukan ko na rin na sa halip na igisa ang atay, gumamit ako ng food processor at ginawa koi tong puree (hilaw) at inihalo sa tinadtad na laman ng baboy at saka iginisang muli. Maganda na ito rin ay gawin sapagkat lumalabas ang lasa ng atay at naihahalong mabuti ito sa lahat.