Ano patok na negosyo sa 2020? Raket mapagkakakitaan maliit na puhunan

Rizza Floro
is a Talent scout in Japan

Marami ang may magandang ideya para sa itatayo na negosyo, ngunit ang mga negatibong damdamin ang malimit na pumipigil sa kanila upang ituloy ang kanilang ideya. Para sa iba, ang humahadlang sa kanila ay ang kawalan ng tiwala sa sarili o pagdududa sa kanilang kakayahan. Ang iba naman ay takot magsimula na baka hindi magtatagumpay ang kanilang planong negosyo dahil sa walang sapat na kapital.



Pakaisipin na ang tagumpay ay nasa ating pananaw at isipan. Kapag nanindigan na kikita ka ng isang milyon, malaki ang tsyansa na makakamit mo ito. Ngunit kapag nakamit mo na ang isang milyon, maaring matakot ka na baka mawala ito, at malamang mapatotohanan mo rin ang iyong negatibong iniisip. Kaya’t importante ang pag papanatili ng positibong saloobin.

Iilan sa mga importanteng sangkap ng matagumpay na negosyo ay ang ideyang pinag-isipan, pinagplanohan, at pinaghihirapan. Subalit wala ring perpektong plano ang importante ay umaksyon, humakbang at umpisahan kaagad ang iyong pangarap ng paunti-unti. Madapa ka man at magkamali, matututo kung paano umiwas at magiging mas mahusay sa susunod.

Dalawang klase ng negosyo ang aking tatalakayin, ito ay ang May maliit na puhunan at ang pangalawa ay May katamtamang puhunan.


Maliit na Puhunan
May iba’t ibang klase ng negosyo na maaaring ipatayo, ito ay depende sa laki ng iyong puhunan. Isa sa aming ibibigay na mga halimbawa ay ang maliit na puhunan. Kapag sinabing maliit na puhunan ito ay nagsisimula sa 5,000.00 pataas. Kung ikaw ay maabilidad, masipag, at may tiwala sa sarili malaki ang tyansa na ang maliit na puhunan ay mapapalago.

Narito ang apat na mga halimbawa para sa maliit na puhunan

1. Paggawa ng kandila
Ngayon ay nagiging uso na ang mga espesyal na kandila. Mula sa tradisyonal na uri at anyo nito, marami ng uri ng kandila ang patok ngayon. Maraming mamimili ang nasisiyahan sa mabangong amoy na dala ng mga espesyal na kandila. Hindi lamang ito ginagamit sa espesyal na okasyon at pang-ilaw sa madilim na tahanan, kundi nagbibigay rin ito ng paglulubay dahil sa mabangong amoy na siyang kinahuhumalingan ng mga mamimili.

Isa itong patok na negosyo hindi lamang sa marami ang mamimili nito kundi pati na rin mura at madaling mabili ang mga sangkap sa paggawa nito. Kung sasamahan lamang ng mabuting pananaliksik at determinasyon ay magbibigay ito ng maraming kita sa negosyo. Pwede itong umpisahan sa pag-part-time lamang, upang unti-unti mapalago at makilala ng mga parokyano.

2. Pag imprenta ng mga T-shirt
Ito ay isang negosyo na hindi tumatanda o nawawala sa uso. Ang paghahanap ng desenyo na ipiprinta sa mga damit ay madali lamang hanapin. Naglipana ang mga magagandang imahe sa internet na pweding gamitin. Pwede ring gumawa ng sarili mong desenyo mula sa hugis ng damit hanggang sa larawan na ipiprinta dito. Imahinasyon lamang ang limitasyon sa negosyong ito. Pwedi kang gumawa ng damit para sa mga magkasintahan, damit para sa mga empleyado ng kompanya, t-shirt para sa kampanya at iba pang mga damit. Nauuso rin ngayon ang mga matching family shirts o couple shirts, kung saan magkaparehas ang disenyo ng damit ng magasawa at kanilang mga anak.

Kailangan mo lang tandaan kung magsisimula man sa negosyong ito ay dapat na maganda ang desenyo at maganda ang kalidad ng damit na iyong gagamitin.

3. Pag aalaga ng Hayop
Kahit ano man ang estado ng ekonomiya ng isang bansa, pinahahalagahan pa rin ng tao ang kanilang alagang hayop. Isa kasi ang alagang hayop sa nagpapasaya sa mga tao. Karamihan sa mga mayayaman ay tinuturing na parang kapamilya na ang mga alagang hayop. Ang pagbebenta ng mga pagkain, kagamitan o kakaibang damit ng alagang hayop ay isang magandang paraan upang makakita ng pera. Kung ikaw ay mahilig rin sa hayop, magisip ng kakaibang gamit o produkto na wala pang masyadong nagbebenta.

Pagkatapos sumali sa mga social media groups at i-advertise dun ang ibinebenta. Kapag maganda ang iyong produkto, paguusapan ka ng mga tao at ituturo ka ng mga mamimili na nasiyahan sa iyong ibinebenta. Sa pagumpisa sa maliit, maaaring lumago ang negosyo at saka ka magbukas ng sariling pet shop sa hinaharap.

4. Pagtitinda sa Food Cart
Isang negosyong nananatiling kilala ay ang pagtinda sa food cart. Iba’t-ibang klase ng pagkain ang pwede mong ibenta gamit ang food cart. Mura lamang ang pwedeng ipuhunan sa mga pagkaing pweding itinda dito, gaya ng meryendang pagkain, pritong patatas o french fries at kakaibang snacks. Mag-research sa internet ng mga pagkain sa iba’t ibang parte ng mundo, at baka may pagkain na wala pa sa Pinas ngunit magustuhan ng panlasang pinoy.

Marami rin ang lugar na pweding paglagyan at pagbentahan ng food cart. Kung gugustuhin mo rin pwede kang magbenta ng iba’t-ibang pagkain kada linggo o kada buwan. Ngunit isa ang negosyong food cart sa mga negosyong medyo maliit ang tubo sa bawat order, kaya naman ang susi dito ay ang dami ng iyong mabibenta. Kapag gusto mong kumita ng malaking halaga dapat ay pag aralan kung saang lugar ang may maraming mamimili.

5. Tutorials
Ang pagtu-tutor ay magandang business rin na pagkakitaan. Maaari itong part-time o full time. Dahil sa sunod-sunod na pagdating ng mga dayuhan sa ating bansa, mas lalo pang lalago ang tutorial business. Pwede pa itong isagawa sa internet o sa mga classrooms. Karamihan sa mga estudyante ay banyaga, ngunit likas naman sa atin ang pagiging pasensyoso kaya madali lamang silang maturuan.


6. Online Business
Maraming magagandang businesses ang pwedeng simulan online. Halimbawa ang e-commerce, o buying and selling online. Sa pamamagitan ng pagpo-post ng products online ay maaaring makapagbenta sa customers at convenient pa. Kung ikaw ay may likas na galing sa pagsulat, maaari ring mag-blog. Sa pagsulat ng blog, kailangang bihasa sa topic upang makakuha ng readers. At ang blogs ay nagagamit rin sa affiliate marketing para makapag-advertise ng ibang mga services o mga produkto.

Sa kabilang-banda, merong tinatawag na virtual assistants kung saan sila ay nanatili lamang sa kanilang mga bahay at nagbibigay ng remote services, tulad ng pag-answer sa telepono at pagreresearch para sa client.

Katamtaman na Puhunan
Walang negosyong madaling simulan at palaguin ngunit may mga negosyong sadyang in demand sa ngayon. Kung kaya naman dapat nating malaman kung anu-ano ang mga ito para paglaanan natin ng pansin para sa potensyal na kumikitang kabuhayan.  Masasabing katamtaman kapag nagsisimula sa 50,000 pesos pataas ang puhunan. Kapag medyo malaki-laki ang iyong puhunan o mayroon ka nang pwesto o lugar na matatayuan ng negosyo, ito ang mga maaaring itayo:

1. Home-based business
Merong sandamak-mak na negosyong maaaring pasukan sa homed-based business.

Magandang mamuhunan para sa catering. Ang catering ay madaling palaguin kung magaling kang magluto. May nagki-cater na nagluluto mismo sa bahay ng customer at meron rin namang nagpapa-order.

Maganda rin ang 
Egg business o pagbebenta ng itlog na gawing negosyo sa bahay. Patok din ngayon ang panaderya dahil sa pagkahilig ng mga pinoy sa pandesal.

Ito ay ginagawa nilang almusal sa umaga bago pumasok sa trabaho o paaralan. Siguraduhin lamang na fresh lagi ang mga tinapay upang tangkilikin ng mga mamimili.

2. Pagaalaga sa may edad (Senior Care)
Sa paghaba ng edad ng populasyon, kasabay ring dumadami ang bilang ng matatanda at retirees. Kaya naman hindi na kaila na umusbong ang industriya ng senior care. Isa ang home care sa services ng senior care. Ito ay ang pagbibigay ng serbisyo sa mga matatanda kasabay na ang pag-aalaga sa kanila.

Mabenta rin ang real estates sa senior citizens dahil maraming retirado ang bumibili ng mga ito.

3. “Green Business” o Recyclable energy Business

Dumarami na sa ngayon ang nag-iinvest sa green energy. May report na nagsasabing ang mga kompanya na may kinalaman sa solar power, bio-fuels at batteries ang may pinakamalalaking investments pagdating sa green technology at tiyak ang income.


4. Services business
Ang pinagkaiba ng isang merchandising o trading business sa isang service-based business ay ang pagkakaroon ng stock inventory ng mga produkto. Kinakailangan ng isang merchandising business tulad ng supermarket o hardware store ang pagkakaroon ng imbentaryo ng mga produkto na ibinebenta. Sa kabilang banda, ang service business naman ay nagbebenta ng serbisyo sa kanyang parokyano.  

Ang ilang halimbawa ng service business ay ang nail salon o home-service na manicurista, massage spa, barber shop o beauty salon.  Uso at may demand rin ngayon ang hairdressing business at car wash business.
Dahil puno ng stress ang buhay natin ngayon, naghahanap tayo ng konting ginhawa man lang sa araw-araw. Kaya naman maigi ang negosyo tulad ng spa at pagpapaganda.

5. Tourism o Panlalakbay
Maaari rin mamuhunan sa tourism business. Likas na may magagandang tanawin sa Pilipinas na maaaring pagyamanin at pagkakitaan. Marami tayong mga beaches at eco-tourism spots, tulad ng Boracay, Banawe Rice Terraces, Mount Apo, Puerto Princesa Palawan, atbp. Mayroon din mga makasaysayang lugar tulad ng Intramuros at Fort Santiago sa Maynila o Calle Crisologo sa Vigan, Ilocos Sur. Maaaring magumpisa sa pagiging tourist guide o pag-organize ng travel tour sa mga dayuhan. Sa pamamagitan lamang ng social media o internet travel websites, pwede na mag-anunsiyo at mag-alok ng mga turita na gustong makapaglibot sa Pilipinas.

6. Pampalamig Business
Alam nating ang klima ng Pilipinas ay napakainit kaya naman mabilis ang usbong ng mga pearl milk tea or sago bubble shakes. Ang negosyong ito ay malakas talaga sa kabataan dahil masarap at nakaka-relax. Ang mga tea ngayon ay napakarami nang flavors na mapagpipilian.

May iba naman na nagbebenta ng iba’t ibang prutas na shakes, tulad ng buko shake o mango shake. Mabenta din sa mga pinoy ang red ice tea at gulaman. Pwera sa mas mura ito din ay mapatid uhaw. Kaya naman aliw na aliw ang customers dito.

7. Food Business
Tayong mga Pilipino ay ipinanganak na sadyang mahilig sa pagkain. Kaya naman hindi basta basta malulugi ang pagtatayo ng kainan. Pwede rin pag-aralan ang pagtatayo ng kakaibang cakes at cupcake shops, tulad ng special carrot cakes o ibang natatanging sangkap na perpekto para sa mga espesyal na okasyon.

Ano man ang napupusuan mong negosyo, laging tandaan na kailangan ng tamang pagsasaliksik. Maaaring gawing negosyo ang kung ano man ang kinahihiligan o talento. Dahil sa halos lahat ng tao ay nakakonekta na ngayon sa internet, madali na lamang umpisahan ang pagbebenta ng mga pambihirang produktong naaayon sa edad, kasarian at hilig ng tao.

 

About the author

Rizza Floro

Profession: Talent scout
Japan , Tokyo , Tokyo

 

Reply as anonymous (Your real name and picture will not be seen)

Disclaimer: Buhay OFW is not a Registered Investment Advisor, Broker/Dealer, Financial Analyst, Financial Bank, Securities Broker or Financial Planner. The Information on the Site is provided for information purposes only. The Information is not intended to be and does not constitute financial advice or any other advice, is general in nature and not specific to you. Before using Buhay OFW’s information to make an investment decision, you should seek the advice of a business professional, qualified and registered securities professional and undertake your own due diligence. None of the information on our Site is intended as investment advice, as an offer or solicitation of an offer to buy or sell, or as a recommendation, endorsement, or sponsorship of any security, Company, or fund.

Buhay OFW is not responsible for any investment decision made by you. You are responsible for your own investment research and investment decisions.