Gamot ng Mahihirap sa Ubo’t Sipon

May mga murang lunas sa mga sakit ang mga mahihirap. Dahil sa hirap ng buhay, ayaw ng mahihirap gumastos. Isa pa, mayroon naman talagang mga natural na gamot na ginagamit noon pa man, at napatunayang mabisa. Kahit ang mga doctor ay alam ang mga natural na gamot, at kahit sila din mismo ay nagsasabi na hindi magandang uminom ng anti-biotic parati, dahil nawawala ang bisa nito pag palaging iniinom.

Ipapakita namin sa videong ito ang isang natural na gamot sa simpleng ubo’t sipon na ginagamit ng mahihirap, dahil mura lang ang sangkap nito. Para sa mga kinakapos, di naman kelangan daw gumastos ng malaki. Pwede mong subukan kung mabisa nga ito o eepekto sayo. Pero paguusapan rin naming pagkatapos kung ano sinasabi ng mga eksperto tungkol dito.
 
Una, maghiwa ng 8 kalamansi. Hiwain ito ng pahalang, at hindi patayo na mula sa tangkay. Ipiga ito sa isang malaking mangkok o baso at gumamit ng strainer upang hindi masama ang mga buto. Pagkatapos, balatan ang 3 pirasong Snow Bear menthol candy at ihalo ito sa katas ng calamansi juice. Magpakulo ng mainit na tubig, at ihalo ito sa timpla ng calamansi at candy. Makikita mo na matutunaw unti unti ang Snow Bear candy. Haluin ng kutsara ng paulit ulit hangang sa matunaw lahat ng candy. Pagnatunaw na at nahalo na ng mabuti, pwede mo na itong inumin.  
 
Ano sinasabi ng siyensiya tungkol dito? Ayon sa mga doctor at eksperto, ang menthol ay nakakapagbigay ng panandaliang ginhawa sa ubo at pananakit ng lalamunan, dahil nakakapagpamanhid ito ng balat. Ngunit maaaring ma-irritate ang iyong lalamunan o lumala ang iyong ubo. Imbis na menthol candy, maaaring maghalo nalang ng honey sa mainit calamansi juice, dahil may anti-bacterial properties ang pulot-pukyutan.
 
 Babala: Di pwedeng walang laman tiyan o di pa kumakain kung iinom ang timpla ng calamansi at menthol candy. Iwasan din uminom nito kapag maselan ang iyong tiyan, tulad kung may acid reflux o hyperacidity ka. Iwasan rin ito inumin araw-araw. Iwasan ang menthol candy kapag malala ang iyong sore throat, at mas mabuting magpatingin sa doctor, lalo na kapag di ka pa gumagaling pagkaraan ng 7 araw.