Dito sa UAE, may dalawang klase ng kontrata ang mga manggagawa o empleyado, ito ay ang Limited o “Fixed-Term” at ang pangalawa ay ang Unlimited na kontrata. Ito ay nakasaad sa labour contract na pinirmahan bago magsimula sa trabaho. Alamin ang pagkakaiba sa dalawang kontrata.
Limited o “Fixed-Term” Contract
Ang kontratang ito ay may nakasaad ng simula at katapusang petsa. Hindi ito dapat lalagpas sa apat na taon, maliban na lang kung ito ay itutuloy ayon sa pagkakasundo ng Employer (May-Ari ng kumpanya) at Employee (Manggagawa o empleyado). Ito rin ay awtomatikong makakansela oras na matapos ang nakasaad na petsa o “Expiry”. Kadalasan, ang kontrata ay dalawang taon, kung hindi na ninanais ng employee ang magpatuloy, maaari lang sabihin sa employer na ikaw ay hindi na pipirma nang bagong kontrata at base sa “Expiry Date” ng iyong kontrata at visa, mayroon kang ilang araw (30 Days) para manatili sa UAE at maghanap ng panibagong trabaho. Karamihan sa ating mga kabayan ay nagsisimula na maghanap ng panibagong lilipatang trabaho isa o dalawang buwan bago matapos ang kontrata.
Unlimited Contract
Ang kontrata namang ito ay may nakasaad ng simulang petsa ngunit walang eksaktong katapusang petsa. Ang kontratang ito ay maaaring makansela ng Employer o employee basta’t mayroon lamang “30 days’ notice” o nakapagsabi ng mas maaga sa intensyon na pagtapos o pag-kansela ng kontrata. Ang Employment Visa ay kadalasang dalawang taon kaya’t kapag natapos na ang Visa, ang Employer o Employee ay maaaring magdesisyon kung magpapatuloy o kukuha muli ng panibagong Visa. Dahil sa ang kontrata ay unlimited, ito ay hindi awtomatikong matatapos o mag-eexpire hindi katulad ng limited. Dahil dito, kung ang isang empleyado ay wala nang balak magpatuloy ng trabaho sa parehong kumpanya at nalalapit na ang katapusan ng visa, maaari ng mag-bigay ng “notice” sa employer upang simulan na ang proseso ng kanselasyon.
Larawan: Bahaging halimbawa ng kontrata
Paano ang proseso ng kanselasyon?
Ang Employer o PRO (Public Relations Officer) ng kumpanya ang siyang mag-aayos ng kanselasyon para sa empleyado. May mga dokumento na ipapasa katulad ng Passport ng empleyado, Labour card at Application form kasama na ang iba pang mga dokumento mula sa Sponsor o kumpanyang pinagtatrabahuhan. Humigit kumulang AED 250 ang babayaran o gagastusin, ito ay dapat sagutin o bayaran ng employer. Ang pagkansela ng kontrata ay umaabot halos dalawang linggo. Kasabay ng pag-expire ng Employment visa ang Emirates ID o Residency. Kapag ang lahat ng ito ay natapos na, mayroong “30 days grace period” para makahanap ng panibagong trabaho na siyang magbibigay ng panibagong kontrata at employment visa.
Paano kung hindi makahanap agad ng trabaho matapos ang 30 days o kung nakahanap ng trabaho ngunit hindi agad na proseso ang panibagong kontrata at visa?
Kapag malapit na matapos ang 30 days grace period at walang nahanap na trabaho o di kaya ay kasalukuyang inaayos ang kontrata at visa, maaaring mag-exit o lumabas muna ng UAE dahil kung hindi, magkakaroon ng “overstay charges” sa halagang AED 25 bawat araw, maliban na lang kung ito ay handang bayaran ng kumpanya habang inaayos ang bagong kontrata at visa para sa nakahanap agad ng tarabaho. Sa wala pang nahahanap na trabaho, kailangang lumabas muna ng bansa at bumalik ng naka-visit visa. Para sa ibang kabayan, pagkatapos ng kontrata, kadalasan ay umuuwi muna ng pilipinas para makapag-bakasyon matapos ang ilang taong pagtatrabaho sa UAE.
Ang artikulong ito ay dagdag kaalaman lamang at magsisilbing gabay para sa mga kabayan, mabuting magtanong sa Ministry of labour o Immigration para mas mabigyan ng linaw.