Bagamat ang sobrang araw ay nakakapinsala sa balat, ang sapat na dami ng sinag ng araw ay nakakabuti, dahil ito ay tumutulong sa paggawa ng Vitamin D. Kung gaano katagal kang magbababad sa ilalim ng araw upang makakuha ng sapat na Vitamin D, at kung gaano katagal kang mananatili sa ilalim ng araw bago mapinsala ang iyong balat, ay nagdedepende sa ilang mga bagay. Kalakip na dito ang iyong lokasyon sa mundo, kung anong klaseng balat meron ka, at kung anong oras na sa isang araw.
Ang pagkuha ng kaunting sinag ng araw ay nakakabuti dahil tumutulong ito sa katawan na makuha ang Vitamin D na kinakailangan nito. Ikaw ay nakagagawa lamang ng Vitamin D kapag ang iyong balat ay nasisinagan ng araw. Ang pagkakaroon ng sapat na Vitamin D ay maaaring makabawas sa iyong tsansa na magkaroon ng ilang mga kanser, datapuwat marami pang pananaliksik ang kinakailangang mangyari. Ang Vitamin D ay kilala rin na importanteng parte para maging malusog ang mga buto. Subalit kailangang balansehin ang importansya ng Vitamin D sa potensyal na pinsala na magagawa ng pagbababad sa araw ng mahabang oras.
Mahirap matukoy kung ilang oras ka talaga dapat nasa ilalim ng araw upang makakuha ng sapat na Vitamin D o kung gaano kahaba ng oras ka mananatili sa ilalim ng araw bago ka magkaroon ng paso sa balat. Ito ay dahil maraming mga bagay na makakaapekto kung gaano matatagalan ang init ng araw. Ang ilan sa mga ito ay nasa ibaba:
• Ang “season” o panahon ng taon. Kailangang magbabad lamang ng kaunting oras sa ilalim ng araw kapag tag-init (summer) na mga buwan upang makakuha ng Vitamin D. Ang iyong balat ay mas madali ring masusunog sa panahong ito.
• Kung anong oras tayo sa isang araw. Kapag ang araw ay napakataas sa langit, ang iyong balat ay masusunog sa loob ng kaunting oras kaysa sa kapag ang araw ay mababa kung tingnan sa langit. Kailangan mo ng kaunting oras lamang sa pagpapa-sailalim sa init ng araw kung tanghali na upang makakuha ng Vitamin D kaysa sa pag-expose sa iyong balat sa umaga o sa gabi.
• Kung nasaan ka matatagpuan sa mundo. Kapag mas malayo ka sa “equator” o kalagitnaan ng mundo, mas matagal ang ginugugol na panahon upang umabot ang vitamin D na kailangan mo mula sa araw. Kapag naman nakatira ka nang mas malapit sa “equator”, ang iyong balat ay mamumula o mas masusunog nang mas madali kaysa sa isang tao na nakatira malayo sa “equator”.
• Ang klase ng iyong balat. Kapag mas maitim ang iyong balat, mas matagal ka rin dapat magbabad sa araw upang makuha mo ang iyong kinakailangan na Vitamin D. Ang mga taong mapuputi ay mas madaling nasusunog ang balat kaysa sa mga taong mas maiitim.
Marapat na makakuha ka ng sapat na Vitamin D sa panahon ng tag-init sa pamamagitan ng sandaling pananatili sa ilalim ng araw na walang sunscreen na ginagamit. Sa pangkaraniwan, ang ilang minuto na eksposyur sa ilalim ng araw sa kalagitnaan ng araw nang walang sunscreen ay sapat na na makapagbibigay sa iyo ng Vitamin D na iyong kinakailangan at hindi naman nakakapinsala. Ang kaunti ngunit palagiang pagbababad sa araw at kung mas marami ang balat na pinapakita mo sa araw, ay mas nagpapadali sa pagkuha mo ng Vitamin D na kailangan ng iyong katawan. Ngunit huwag hayaang mamula ang iyong balat, sapagkat ito ay sintomas na nasobrahan ka sa araw. Pag-aralan kung gaano katagal mong kayang magtagal sa araw na walang nangyayaring pagkasunog ng balat. Kapag inaasahan mong magtatagal ka sa ilalim ng araw nang mas mahaba pa sa ilang minuto, marapat mong sundin ang karaniwang mga payo ukol sa “sun care” – manatili sa ilalim na lilim ng punung-kahoy, pahiran ang balat ng sunscreen kapag ang iyong balat ay masyadong nae-expose sa araw.