Ang Polycystic Ovary Syndrome (PCOS) ay isang kondisyon kung saan nawawalan ng balance ang “hormones” sa katawan ng kababaihan. Nagdudulot ito ng problema sa iyong buwanang-daloy o menstruation, at nagpapahirap sa babaeng magdalang-tao o mabuntis. Ang PCOS rin ay nagdudulot ng hindi magandang pagbabago sa itsura ng babae. Kung hindi malulunasan, sa paglipas ng ilang taon, maaari itong makapagdala ng seryosong problema sa kalusugan tulad ng diabetes at heart disease.
Maraming kababaihan na apektado ng PCOS ay may maliliit na cysts na tumubo sa kanilang obaryo o “ovary”. Kaya ito tinatawag na polycystic ovary syndrome. Ang mga cysts ay karaniwang hindi nakakapaminsala subalit nagdulot ito ng ‘hormone imbalances’.
Sa pamamagitan ng maagang pagpapatingin sa doctor at paglunas sa sintomas, maiiwasan ang mga malubhang problema.
Ang mga “hormones” ay mga kemikal na tagadala ng mensahe sa katawan upang magawa ng katawan ang mga gawain tulad ng produksyon ng enerhiya. Sa hindi malamang mga dahilan, sa PCOS, ang hormones ay hindi nagiging balanse. Ang pag-iiba sa produksyon ng isang hormone ay umaapekto sa produksyon ng isa pang hormone. Halimbawa nito ay kapag hindi balanse ang “sex hormones”. Sa normal na sitwasyon, ang obaryo ay gumagawa ng maliit lamang na bilang ng “male sex hormones” o “androgens”. Kapag nawala ang balanse, gumagawa ang obaryo ng mas marami kaysa sa normal na “androgens”. Maaaring magdulot ito sa kababaihan na huminto sa pag-ovulate, makasanhi ng maraming tagihawat, tumubo ang maraming balahibo sa mukha at katawan. Isa pang halimbawa ay maaaring magkaproblema sa paggawa ng “insulin”, ang hormone na responsable sa pag-regulate ng glucose sa ating katawan. Dahil sa pagbabago sa hormone level, ang ating asukal sa dugo (blood sugar level) ay maaaring tumaas at sa pagtaas nito ay maaari tayong magka-diabetes.
Ang sanhi ng PCOS ay hindi pa ganap na mawari subalit ang pagkakaroon nito sa ating ninuno ay isang dahilan (genetics). Kung mayroong PCOS ang ilan sa iyong kapamilya ay maaari ka ring magkaroon nito. Maaari itong magmula sa lahi ng iyong ina o ama.
Ang sintomas ng PCOS ay hindi masyadong seryoso sa simula. Maaari ka lamang makaramdam ng ilang sintomas tulad ng tighyawat, pagbigat ng timbang o hirap sa pagbabawas ng timbang, mas maraming balahibo sa mukha at katawan. Malimit na ang kababaihan ay magkakaroon ng makakapal at maiitim na balahibo sa mukha, sa dibdib, tiyan at likod. Mayroong pagnipis sa buhok sa ulo, hindi regular ang buwanang daloy, may problema sa pagbubuntis, at maaaring magka-depresyon.
Upang malaman ng doktor kung merron ka bang PCOS, magtatanong muna siya ng mga nakaraang kondisyon ng kalusugan, mga nararamdamang sintomas at “menstrual cycles”. Siya rin ay gagawa ng pagsusuri sa iyong katawan, kukunin ang iyong timbang at tangkad at titingnan ang iyong body mass index o BMI. Karaniwan gagawa rin ng “lab tests” upang malaman ang dami ng asukal sa katawan, insulin, at iba pang pagsusukat ng hormones. Maaari ring sumailalim ang pasyente sa pelvic ultrasound upang tingnan kung meron bang cysts sa obaryo.