Ano ang Raspa?
Ang raspa ay isang paraan ng pag-oopera na naglalayong alisin ang ilang himaymay (tissue) ng o ilang bahagi ng inunang naiwan sa loob ng bahay-bata o matres (womb or uterus) ng isang babae matapos niyang makunan, manganak ng di ganap sa panahon o magpalaglag. Bukod pa rito, maaaring ang maging layunin ng pagraraspa ay upang malaman ang dahilan o di kaya'y gamutin ang abnormal na pagdurugo dulot ng fibroids, polyps, endometriosis, hormonal imbalances at kanser sa uterus. Ang kaalaman tungkol sa operasyong ito ay makatutulong upang masiguro ang kahandaan at maiwasan ang anumang di inaasahang pangyayari na maaring magdulot ng panganib sa buhay ng pasyente.
Paano ginagawa ang raspa?
Bago isagawa ang operasyon, ang pasyente ay inaasahang makatatanggap ng general o local anesthesia upang hindi maramdaman o mabawasan ang sakit. Ang ibibigay na anesthesia ay ibabatay sa dahilan kung bakit gagawin ang operasyon. Sa kabilang dako, asahan ding ipoposisyon ang pasyente ng nakahiga samantala ang kanyang sakong ay nakapatong sa estribo (stirrups). Ang buong operasyon ay tatagal lamang ng labinlima hanggang tatlumpung minuto at pagkatapos nito, maaaring kailanganing manatili ng pasyente sa 'recovery room' upang masubaybayan ang pasyente para sa posibleng matinding pagdurugo at iba pang komplikasyon, gayundin upang mabigyan ng panahong manumbalik ang kanyang lakas hanggang sa mawala ang epekto ng anesthesia. Ilan sa mga inaasahang normal na mararamdaman ng pasyente ay ang pamamanhid at pagdurugo.
Ano mangyayari o maaasahan pagkatapos ng raspa?
Tulad ng nabanggit sa itaas, maaring makaranas ang pasyente ng sakit gaya ng karaniwang nararanasan tuwing siya ay may buwanang dalaw. Dahil dito, makatutulong ang pag-inom ng gamot na mabibili sa botika kahit walang preskripsyon mula sa kanilang doktor (over-the-counter pain relievers). Ilan sa mga ito ay ang mga gamot na walang aspirin tulad ng ibuprofen at acetaminophen. Bukod dito, maaring makaranas din ng hirap sa pag-ihi resulta ng paglalagay ng sonda (catheter) sa loob ng ilang araw. Ang pagtatalik o ang paglalagay ng anumang bagay sa loob ng pwerta gaya ng tampon ay hindi rin pinahihintulutan sa loob ng dalawang linggo matapos and operasyon. Higit sa lahat, dapat ding malaman ng pasyente ang ilan sa mga sintomas na nangangailangan ng agarang konsultasyon: lagnat na higit sa 100 degrees F, matinding pananakit na hindi nawawala kahit uminom ng gamot, hindi makaihi, matinding pagdurugo at paglabas ng mabahong amoy mula sa pwerta.
