Sa panahon ng unang ilang buwan ng buhay ng iyong sanggol, magbigay ng partikular na atensyon kung sa palagay mo ay nilalagnat siya. Hindi pa gaanong malakas ang kanyang resistensya upang labanan ang mga impeksyon kumpara sa kapag nasa 3 o 4 na buwan na siya.
KAILAN MASASABING LAGNAT ITO?
Ayon sa karamihang doktor, may lagnat ang isang sanggol kung ang temperatura niya ay 38 degrees Celsius (100.4 Fahrenheit) o higit pa. Pinakamainam na kunin ang kanyang temperatura sa pamamagitan ng kanyang tumbong. Kunan siya ng temperatura makailang beses kapag maayos ang kanyang pakiramdam upang malaman mo kung ano ang kanyang karaniwang temperatura.
KAILAN DAPAT PUMUNTA SA DOKTOR?
Kung mas mababa sa 3 buwang gulang ang iyong anak at siya ay nilalagnat, dalhin siya sa doktor. Para sa unang 6 na buwan ng kanyang buhay, tawagan ang iyong doktor anumang oras na mayroon siyang lagnat.
Sa susunod na checkup ng iyong anak, maaari mong tanungin ang doktor kung mayroon bang “patakaran sa lagnat”. Mabibigyan ka noon ng mas maraming kaalaman kung kailan mo kailangang tumawag. Kung nag-aalala ka, manigurado ka na: Tawagan mo na ang doktor.
Bahagi lamang ng buong kwento ang lagnat. Minsan, maaaring may sakit ang isang sanggol kahit na wala siyang lagnat. Mas mahalagang tanong ang: Nagpapakita ba ng ibang sintomas ng sakit ang iyong sanggol? Tawagan ang doktor kung ang iyong sanggol ay:
· Iritable
· Hindi aktibo
· May kabagalang kumilos
· Hindi kumakain
· Nahihirapang huminga
· Mayroong butlig-butlig sa katawan
· Nagsusuka
· Nagtatae
BAKIT MAY LAGNAT ANG BATA O SANGGOL? ANO DAHILAN NG LAGNAT?
Maraming maaaring maging dahilan kung bakit nilalagnat ang iyong sanggol, ngunit ang pinakakaraniwan ay impeksyon. Ang mga simpleng bagay tulad ng sipon ay maaaring magdulot ng lagnat, ngunit gayundin ang mga malulubhang impeksyon tulad ng meningitis. Kung ang iyong anak ay mas bata sa 3 buwang gulang at may lagnat, pumunta ka na sa doktor o pediatrician. Matutukoy ng doctor ang sanhi ng paglagnat at mabibigyan kayo ng doktor ng reseta o mabisang lunas o gamot sa sinat o lagnat ng bata.
