Ang nag-keloid na peklat ay mahirap gamutin pero may mga lunas na maaaring makatulong. Pwedeng irekomenda ng iyong surgeon ang mga lunas na magpapantay o magtatanggal sa peklat.
Ang keloid ay paglala ng scar tissue o peklat na tumutubo lagpas sa sugat. Karaniwang nagkakaroon ng keloid ang mga nakababata mula 10 hanggang 30 na taon, at may lahing asyano (asian) o afrikano. Kadalasang makikita ang keloid na namumula at may umbok, at maaari ding masakit kapag hinawakan. Maaaring pumantay din naman ito at hindi na kapansin-pansin pagkaraan ng maraming taon.
Kapag may history ang pamilya ng matinding pamemeklat, mahalagang sabihan ang iyong surgeon bago sumailalim sa operasyon. May mga paraang magagawa ang doktor para bawasan ang panganib na magkaroon ng keloid, kagaya ng paggamit ng pressure dressing o silicone gel sheeting sa iyong gumagaling na sugat.
Mahirap gamutin ang nagkeloid na peklat, at maaari itong magpabalik-balik. Kakailanganin ng paulit ulit na lunas kada ilang taon para mapaganda ang itsura ng nag-keloid na peklat. Ang mga sumusnod ay maaaring lunas sa keloid:
• Steroids. Ang tape na naglalaman ng steroid ay ginagamit sa umaga at sa gabi sa mahabang panahon, o kaya ang malakas na steroid ay diretsong iniiniksiyon sa peklat para tulungan itong palambutin at paliitin. Maaaring makaranas ng side effects kagaya ng pagnipis ng tissues sa ilalim ng balat na pwedeng magresulta sa paglalim ng peklat o tinatawag na sunken scar.
• Surgery. Ang pagtanggal ng peklat ay pwedeng magdulot ng mas manipis na peklat ngunit mataas ang panganib na magkaroon ulit ng keloid.
• Radiotherapy. Kung minsan, ginagamit ito kasama ng surgery para agapan ang nagkeloid na peklat. Ngunit may panganib na magkaroon ng skin cancer dahil dito. Maaari rin itong magdulot ng skin pigmentation at ulceration na karaniwan bumubuti naman sa katagalan.
• Pressure therapy. Ito ay epektibo matapos ang surgery at kadalasang ginagawang lunas para sa earlobe keloids.
• Experimental treatment. Kasali dito ang laser treatment, pag-iniksiyon ng gamot sa chemotherapy kagaya ng 5-Fluorouracil, at paginiksiyon ng interferon o retinoids sa peklat. Magkakaiba ang antas ng pagiging epektibo ng mga ito.