Kung ang iyong paraan ng pagpapakalma sa sarili bago ang isang interbyu para sa trabaho ay ang paglakad nang mabilis at mabagal habang sinasabing “Kaya mo ito!” hanggang sa halos paniwalaan mo na ito, mayroon kaming magandang balita para sa iyo.
Mayroong mas madami at epektibong paraan upang labanan ang pagkabalisa. Ang lihim na paraan? Ipaalala lamang sa sarili ang bagay na pinakapinahahalagahan mo.
Mayroong simpleng ehersisyong iniaalok ang mga eksperto upang mapangibabawan ang kaba. Maglaan ng ilang minuto upang isulat ang isang bagay na mahalaga sa iyo – halimbawa, pamilya, pagkamalikhain, pagtatagumpay sa karera – at isang panahon kung kailan naging mahalaga ang bagay na iyon.
Maaaring magmukhang walang kinalaman ang ehersisyong ito sa layunin, ngunit ito ay makakatulong upang maalala mo kung ano ang kaya mong gawin bilang natatanging indibidwal.
Sinusuportahan ng lumalaking bilang ng mga pagsisiyasat ang ideyang ito. Ang pagninilay-nilay sa iyong mga pinahahalagahan bilang tao, na tinatawag nilang “pagpapatunay sa sarili”, ay makakatulong upang pangibabawan ang mga mahihirap na sitwasyon.
Sa isang pag-aaral hinggil sa pagpapatunay sa sarili, hiniling ng mga tagapagsiyasat ang 80 undergraduate na magbigay ng limang minutong pananalita hinggil sa dahilan kung bakit magiging mabuti silang kandidato para sa isang trabaho sa kanilang unibersidad.
Idinisenyo ang karanasan upang maging lubhang nakababahala. Matapos ibigay ang pananalita, pinagbilang nang malakas ang mga lumahok nang pabaligtad mula 2,083 sa pamamagitan ng 13 segundong bilang habang sinisigawan sila na “bilisan pa”.
Sa pasimula ng pag-aaral, lahat ng mga kalahok ay sumagot sa isang questionnaire na hiningi sa kanilang iranggo ang halaga ng limang personal na bagay: relihiyon, mga isyung panlipunan, pulitika, teorya, at estetika. Kalahati ng mga kalahok ay sumagot ng mga tanong hinggil sa kanilang pinakapinahahalagahang bagay; ang iba ay sumagot ng mga tanong hinggil sa kanilang pinaka-di-pinahahalagahang bagay.
Ipinakita ng mga resulta na ang mga kalahok na nagpatunay sa sarili sa pamamagitan ng pagsusulat hinggil sa kanilang pinakapinahahalagahang bagay ay nagtala ng higit na mas mababang pagkabahala habang naghahanda para sa pananalita. Sinukat din ng mga tagapagsiyasat ang kanilang antas ng cortisol, isang stress hormone, sa katawan at nakitang ang mga kalahok na nagpatunay sa sarili ay hindi nagkaroon ng makabuluhang pagtaas.
Sa ibang salita, ang simpleng pagninilay-nilay kung sino ka at ano ang iyong mga pinahahalagahan ay maaaring maging sapat upang pahinain ang mga epekto ng isang labis na nakakabahalang karanasan.
Ang pagpapatunay sa sarili ay nagpapadali sa pag-unlad ng ‘presensya’ – na tinutukoy bilang pagkakaroon ng kamalayan at kakayahang ipahiwatig ang iyong tunay na potensyal – sa pamamagitan ng pagpapahintulot sa iyo na maging iyong ‘tunay at pinakamatapang’ na sarili.
Hindi ito tungkol sa paniniwala na ikaw ang pinakamahusay sa papel na ito o pagdedebelop ng di-makatotohanang kumpiyansa sa sarili. Sa halip, ito ay pag-alam na ikaw ay may kakayahang gawin ang iyong pinakamakakaya at ipakita ang iyong mga kalakasan at talento.
Ang pagpapatunay sa sarili ay isang paraan upang sanayin ang ating mga sarili sa katotohanan ng ating mga kwento. Tinutulungan tayo nito upang bawasan ang ating pagdepende sa pagsang-ayon ng iba at pagiging komportable sa kanilang di pagsang-ayon, kung iyon ang ating matatanggap.