Ang pagdadalaga o pagbibinata ay ang panahon kung saan maraming pagbabago ang maaaring maranasan ng isang bata anuman ang kanyang kasarian. Marahil marami siyang katanungan tungkol sa mga pagbabagong ito na kinakailangang isangguni sa kaniyang mga magulang o taga-gabay. Bagama't may pagkakapareho ang pagbabagong mapapansin sa kanilang panlabas na anyo, kilos at pag-iisip, hindi masasabi ng sinuman kung kailan ito mangyayari sapagkat may ibang kabataan na nakararanas ng pagbabago sa edad na 10 hanggang 11 taon para sa babae o 11 hanggang 12 taon para sa lalake at may iba naman na nakararanas ng pagbabago pagtungtong niya ng edad na mas mababa o mas higit pa sa nabanggit.
Para sa mga batang babae, ang ilan sa mga pagbabago sa kanilang panlabas na anyo pagtungtong nila ng edad ng pagdadalaga ay ang paglaki ng dibdib, pagbabago sa hugis ng katawan, pagtangkad, pagkakaroon ng buhok sa iba't ibang bahagi ng katawan gaya ng kili-kili at ari at ang pagsisimula ng buwanang dalaw (menstruation). Sa kabilang dako, ang mga batang lalaki naman ay maaaring makaranas ng ilang pagbabagong pisikal gaya ng paglaki ng ari, pagkakaroon ng buhok sa iba't ibang bahagi ng katawan gaya ng kili-kili, ari at mukha (bigote o balbas), pagtangkad at pagbabago sa kanyang boses.
Puberty
Bukod sa mga nabanggit, mapapansin din natin na ang mga kabataang nagdadalaga o nagbibinata ay madalas ding nagiging papalit-palit ang emosyon dulot ng pagbabago sa balanse ng kanilang hormones. Minsan sila'y nagiging mayamutin, agresibo, mapusok o malungkutin. Maliban sa epekto ng hormones, maaaring maging sanhi rin ng pagbabagong ito ang kakulangan sa tulog, ang kalagayan ng lipunang kanilang ginagalawan o di kaya'y epekto ng kung ano ang karaniwan nilang nakikita sa telebisyon o iba't ibang social media.
Ang iba pang bagay na maaaring bumagabag sa mga kabataang nasa yugto ng pagbibinata o pagdadalaga na maaaring makaapekto sa kanilang emosyon at pakikisalamuha sa iba ay ang sumusunod:
a. Pag-iisip na dahil sila'y hindi na bata, mas maraming bagay ang dapat nilang kayaning gawin at mas maraming tungkulin ang kailangan nilang gampanan
b. Pagnanais na magkaroon ng sariling pagkakakilanlan
c. Pagtuklas sa kanilang sekswalidad
Tunay ngang ang pagdadalaga at pagbibinata ay isang mahalagang yugto ng buhay ng isang tao sapagkat dito niya makikilala ang kanyang sarili at tunay na pagkatao. Subalit ang mga kabataan ay hindi dapat na magmadali sa pagtanda at subukang akuin ang mabibigat na responsibilidad. Sa halip, dapat niyang isaisip na ang tunay na kaakibat ng pagdadalaga o pagbibinata ay ang pakikiisa sa ibang gawain bukod sa kung ano ang nakaugalian noong siya'y bata pa, pagpapaunlad ng kanyang kakayahan at ang pagbabago ng ugaling hindi katanggap-tanggap para sa isang binata o dalaga gaya ng pagiging makasarili o pagsama ng loob sa tuwing hindi naibibigay ang kanyang gusto.
Continue reading: Pagbabago sa katawan ng babae sa pagdadalaga
Continue reading: Pagbabago sa katawan ng lalake sa pagbibinata
Continue reading: Epekto ng maagang pagdadalaga o pagbibinata
